Бу чишмәнең тарихы еракларга барып тоташа.
— Чишмәнең тарихы кайчан барлыкка килүе белән түгел, кайчан халык куллана башлавы белән бәйле, — диде Ташкичүдә яшәүче Нурислам Гәрәев. – Минем 17 буын туганым шушы авылда яшәгән һәм яши. Авыл халкы шушы тирәгә печән чабарга йөргән һәм шушы чишмәнең суын эчкән.
— Җиләккә килүчеләр дә чишмә суы белән сусавын баскан, юл янында гына булганга, узгынчылар биредә тукталган. Берара чишмә үзенең юлын югалткан иде. Лотфулла Шәфигуллин ярдәме белән ул яңадан үз агымын тапты, — диде Ташкичүдән хезмәт ветераны Розалия Насыйбуллина.
— Иң кызыгы, бу чишмәгә яшь чагында Шиһабетдин Мәрҗани еш йөргән. Димәк, ул аның суын эчеп үскән, — диде Лотфулла Шәфигуллин. – Бу чишмәне төзекләндерүгә дә мине шушы әйбер этәрде.